Veslebror ser deg

Sytten år gamle Marcus Yallow er ein hackar som tullar med skulens tryggleikssystem. Men når Bay Bridge i San Francisco blir sprengd i lufta, er Marcus og vennene hans på feil stad til feil tid. 

1

Eg går siste året på skulen Cesar Chavez High i bydelen Mission i San Francisco, og det gjer meg til ein av dei mest overvakte personane i verda. Eg heiter Marcus Yallow, men på den tida då denne historia byrjar, gjekk eg under namnet w1n5t0n. Uttalt «Winston».

Ikkje «Dobbel-ve-ein-enn-fem-te -null-enn» – dersom du då ikkje er ein skuleinspektør utan peiling, så nedsnødd at du enno kallar internett for «informasjons motorvegen».

Eg kjenner ein som har akkurat så lite peiling, og han heiter Fred Benson, ein av dei tre viserektorane ved Cesar Chavez. Han er det du kan kalle eit gapande kjøtsår av eit menneske. Men om du først skal ha ein fengselsbetjent, er det betre med ein utan peiling enn ein som veit kva han driv med.

«Marcus Yallow,» sa han over høgtalar anlegget ein fredag morgon. Høgtalaranlegget er ikkje særleg godt i utgangspunktet, og om du kombinerer det med Benson si sedvanlege mumling, får du noko som høyrest meir ut som nokon som prøver å fordøye ein dårleg burrito, enn ei melding frå rektor. Men menneske er flinke til kjenne igjen namnet sitt i eit lydkaos – det er eit overlevingsinstinkt.

Eg tok sekken min og slo laptopen tre fjerdedelar igjen – eg ville ikkje avbryte nedlastingane mine – og gjorde meg klar for det uunngåelege.

«Meld deg på rektors kontor med ein gong.»

NB! På grunn av opphavsrettar kan vi ikkje publisere meir av teksten.