Utdatert nettleser Det ser ut som du bruker en gammel nettleser. Faktafyk.no krever IE 8 og nyere versjoner av Internet Explorer. Last ned nyere nettleser her

Skogen den grøne

Ruth Lillegraven Samlaget Illustratør: Mari Kanstad Johnsen 2018

INN I SKOGEN

eg
stansar
i ein sving
langs vegen
klyv over
ei grøft

løftar
eit grønt slør
av bjørkeblad

her startar stien

her forlèt eg
bråk og støy

går inn
i ei stillare
mjukare
verd

 

NOKO NYTT

eg er
så lei av alt

søsken, foreldre
lekser, leiker, blokk
og bakgard, alt så
lite og trongt

i skogen
kan konglene vere
vennene mine, søster
og bror, far og mor

og ein dag vil
kanskje ei kongle
opne seg, sleppe eit frø
som blir til ei perle, ein ball
eller ein raud ballong som
svevar vekk mellom trea

 

ORMEN

stien er
ein brun orm
som buktar seg
bort frå alt der ute
inn i det hemmelege

no lokkar han på meg

her har folk gått før
seier han

her kan du også gå

berre vent, det er
så mykje å gjere
så mykje å sjå

 

HAUST

høyr!
kviskrar stien

hausten spring
gjennom skogen
stel sommaren
og kjem med
vinteren

og sjå!
gule lauv ligg og
lyser på bakken

det er gullmyntar
som hausten har
strøydd ut

 

ÅRSTIDENE

eg set meg
i fanget til den
store furua oppe
på haugen, lèt henne
breie vengene sine
over meg

herfrå ser eg
blåne på blåne
og ås på ås

tusenvis av tre

hausten har klatra
opp i tretoppane
og blåst eld

no er
skogen den grøne
også skogen den raude
og skogen den gule

 

OM VINTEREN

om vinteren
heng fem istappar
frå mosekledd berg

fem istappar
midt i det grøne

fem isbjørntenner
som liknar spyd

no er det ingen
isbjørntenner her

berre dropar
som dryp og
ventar på
vinter

 

SØKKEMYR

den
brune ormen
forsvinn inn
i skodda og
ut på myra

her finst ikkje
buskar eller tre
berre myrull med
hovud av dun

om
eg følgjer
etter ormen
tek myra tak
kring beina
mine
dreg meg ned
i det svarte
surklande

slurp, seier det

så er eg borte

 

FLAGGERMUS

ei flaggermus
flaksar forbi
i mørket

ho er ikkje farleg
og likar ikkje folk
har dei vaksne sagt

men eg synest likevel
ho er skummel

no kryp eg langs bakken
prøver å krympe meg
bli ein modig maur

Til toppen